Ош шаарында 815 батирге ылайыкталган жаңы көп кабаттуу үйдүн курулушу башталды. Бул тууралуу Ош шаардык мэриясы билдирди.
Жаңы турак жай Көчкөнөв көчөсүндөгү №135 даректе курулуп, 6 кабаттуу 19 блоктон турат. Долбоорду Ош мэриясынын муниципалдык ипотекалык ишканасы ишке ашырууда.
Маалыматка ылайык, үйдө 246 бир бөлмөлүү, 494 эки бөлмөлүү жана 75 үч бөлмөлүү батир болот. Мындан тышкары, биринчи кабаттарда коммерциялык жайлар, бала бакча жана унаа токтотуучу жай каралган.
Долбоордун негизги максаты- шаар тургундарын жеткиликтүү турак жай менен камсыз кылуу жана ипотекалык курулушту өнүктүрүү.
