Жылдын мыкты мугалими жана тарбиячысы кароо-сынагынын жеңүүчүлөрүнө Daewoo Matiz үлгүсүндөгү унаалар тапшырылды. Бул тууралуу Ош мэриясынан билдиришти.

Бабур атындагы Ош мамлекеттик академиялык өзбек музыкалык драма театрында “Жылдын мыкты мугалими-2023” жана “Жылдын мыкты тарбиячысы-2023” кароо-сынагынын финалдык бөлүгү болуп өттү. Аталган кароо-сынактын финалында шаар мектептеринин, бала бакчалардын 6 мугалими жана 6 тарбиячысы мыкты деген наам үчүн ат салышып, презентациялар, окуу процессиндеги оор кырдаалдан чыгуу жолдору жана таланттар сынактары боюнча таймашышты.

Иш-чаранын ачылышына жана жеңүүчүлөрдү сыйлоо аземине шаардык кеңештин төрагасы Салман Назылбеков, Ош шаарынын мэринин орун басары Нурбек Кадыров, шаардык билим берүү башкармалыгынын башчысы Салтанат Аматова жана билим берүү кызматкерлери катышты.

Сынактын жыйынтыгы менен Ош шаары боюнча «Жылдын мыкты мугалими-2023» номинациясында жеңүүчү деп №37 Г.Айтиев мектебинин мугалими Элнура Алекова аталды, ал эми «Жылдын мыкты тарбиячысы-2023» номинациясында «№35 Асан-Үсөн балдар бакчасынын тарбиячысы Мээрим Тыныбекова жеңүүчү деп табылды.

Калган катышуучуларга акчалай сыйлыктар, ыразычылык барактар жана дипломдор ыйгарылды.