Президент Садыр Жапаров бүгүн, 14-ноябрда, Ысык-Көл облусуна болгон иш сапарынын жүрүшүндө Жети-Өгүз жана Тоң райондорунун эли менен жолугушту.

Жолугушуунун жүрүшүндө жашоочулар Мамлекет башчысына мүлктүк жана жарандык укуктарды коргоо, социалдык маанидеги көйгөйлөрдү чечүү, ошондой эле райондордун инфраструктурасын жана экономикасын өнүктүрүүгө байланышкан ар кандай маселелер менен кайрылышты.

Анын ичинде укук коргоо органдарынын кызматкерлеринин аракеттерине карата даттануулар, турак жай алдамчылыгы, жер жана мүлк талаштарын чечүүгө көмөк көрсөтүү өтүнүчтөрү айтылды.

Мындан тышкары, тургундар туризм тармагын колдоо, туристтик инфраструктура объектилерин куруу үчүн жер тилкелерин бөлүп берүү, суу түтүктөрүн тартуу жана суткалык жөнгө салуучу чакан бассейн куруу маселелерин көтөрүштү.

Ошондой эле ырайым кылуу жана мунапыс берүү, ипотекалык турак жай менен камсыздоо, стадион курууга көмөк көрсөтүү маселелери да козголду.

Мамлекет башчысы жарандардын кайрылууларын угуп, мамлекеттик органдарга айтылган маселелерди адилеттүү кароону камсыз кылууну тапшырды.

Президент Садыр Жапаров көтөрүлгөн көйгөйлөр боюнча тиешелүү иштерди жүргүзүп, чараларды көрүү жана маселелерди биротоло чечүү зарылдыгын баса белгиледи.