Аскат Алагөзовдун атынан шылуундар мамлекеттик органдарга телефон чалып, алар үчүн сатып алынган техникага терминал аркылуу бажы төлөмдөрүн төлөөнү талап кылышкан. Бул тууралуу президенттин маалымат катчысы соцтармактан билдирди.
«Кымбаттуу достор! Мен бүгүн болуп өткөн жагымсыз бир жагдайга көңүлүңүздөрдү бургум келип турат.
Айрым шылуундар менин атыман мамлекеттик органдарга телефон чалып, алар үчүн ар кандай керектүү техника сатылып алынганын айтып, терминал аркылуу бажы төлөмдөрүн төлөөнү талап кылып жатышыптыр.
Мындан тышкары, дагы эле менин атыман шылуундар биринчи айым Айгүл Жапарованын иш-чараларын уюштуруу үчүн акча чогултуп жаткандыгы тууралуу маалыматтар түшүүдө.
Мындан улам, пресс-катчынын милдетине финансылык төлөмдөрдү, каржылык операцияларды жана сатып алууларды жүргүзүү таптакыр кирбестигин дагы бир ирет баса белгилеп айта кетейин.
Сак болсоңуздар, мына ушул сыяктуу махинацияларга алданбасаңыздар. Эгерде маалыматтан күмөн санасаңыздар, аны кайра текшерип, тактаңыздар. Же болбосо менден сураңыздар. Өзүңүздөргө жана акча каражаттарыңызга сак болуңуздар!»,-деп берилет кайрылууда.
