Президенттин Жогорку Кеңештеги мурдагы ыйгарым укуктуу өкүлү Курманбек Дыйканбаев үй камагына чыкты. Бул тууралуу Биринчи Май райондук сотунун басма сөз кызматы билдирди.
Биринчи Май райондук сотунун 1-апрелдеги токтомуна ылайык, Дыйканбаев 24-майга чейин үй камагында болот.
Дыйканбаев 2020-жылдын 24-ноябрында кызмат абалынан кыянаттык менен пайдаланган деген шек менен кармалган. УКМКнын маалыматы боюнча, парламенттик шайлоо учурунда Дыйкаебаев тараптардын биринин кызыкчылыгын көздөп, мамлекеттик ишканалардын биринин жетекчисин ага 7 миллион сомдон ашык акча которууга мажбур кылган. Ошол эле учурда, эгерде баш тартса, кызмат ордунан бошотуу менен коркуткан. УКМК буга чейин белгилегендей, Дыйканбаев бул акчаны шайлоо өнөктүгү маалында көбүрөөк добуш алышын камсыздоо үчүн жумшаган.