Акжол Махмудов менен Жоламан Шаршенбеков Болгариядагы Dan Kolov-Nikola Petrov рейтингдик эл аралык мелдешинде алтын медаль утту.
Спорттук иш-чара 2-5-март күндөрү София шаарында өтүүдө.
Махмудов грек-рим күрөшү боюнча 77 кг салмакта мелдештин 1/16 финалынан баштап катышты. Ал чет өлкөлүк төрт балбанды жеңип финалга чыкты. Финалда армениялык спортчуну 1:1 (ред.: акыркы упайды алган балбан жеңет) эсебинде утуп, алтын медаль багындырды.
Жоламан Шаршенбеков 60 кг салмакта мелдештин 1/8 финалынан баштап күчүн сынады. Ал үч балбанды караандатпай утуп, финалда польшалык балбандын далысын жерге басып, таза жеңишти камсыздады.
Белгилей кетсек, мелдешке Кыргызстандын атынан төрт балбан аттанган.