Санкт-Петербургда 45 жаштагы М.Кубанычбек аттуу кыргыз жараны 17-декабрдан тарта дайынсыз жоголгон. Бир нече күндөн кийин анын сөөгү Ленинград облусунун аймагынан табылды. Бул тууралуу жергиликтүү маалымат булактары жазып чыгышты.
Маалыматка ылайык, М.Кубанычбек 17-декабрдан тарта изделип жаткан. Анын сөөгү 21-декабрда жеке турак жайдын жер төлөсүнөн буту байланып, башына баштык кийгизилген абалда табылды.
Полиция кызматкерлери ошол эле күнү 52 жаштагы жергиликтүү жашоочуну (эркек киши) шектүү катары кармашкан. Кылмыш иши козголуп, тергөө жүрүп жатат.