Египетте өтүп жаткан Ibrahim Moustafa эл аралык мелдешинде кыргызстандык спорчу Айсулуу Тыныбекова алтын медаль утту. Бул тууралуу Бириккен күрөш дүйнөсүнүн (UWW) сайтында жарыяланды.
Тыныбекова кыз-келиндер күрөшү боюнча 62 кг салмакта мелдештин 1/8 финалынан баштап күчүн сынады.
Жарым финалда украиналык Ирина Коляденкону 2:0 эсебинде утуп, финалга өткөн.
Ал эми, алтын үчүн кармашта кыргыз кызы кытайлык Сяоцзюнь Луону 3:2 эсебинде артта калтырып, турнирдин алтын медалына татыды.
Мелдеш 21-25-февраль күндөрү Александрия шаарында өтүүдө.
Эскерте кетсек, ушул эле жылдын 3-февралында Хорватиядагы Zagreb Open эл аралык рейтингдик мелдешинин тандоо турунда Айсулуу Тыныбекова дал ушул кытайлык Сяоцзюнь Луого жеңилип, мелдешттен четтеп калган.
