Кыргызстандык балбан Тынар Шаршенбеков Польшада өткөн күрөш боюнча эл аралык Poland Open мелдешинде алтын медаль утту. Аталган спорттун түрү боюнча федерациядан билдиришкендей, Шаршенбеков 63 килограмм салмакта финалда ирандык Сэм Далири Хоссейн менен күрөшүп, аны 3:1 эсебинде жеңип алды.
Тынар Шаршенбеков апрель айында Монголиянын Улан-Батор шаарында өткөн күрөш боюнча Азия биринчилигинде алтын медаль уткан.
Варшавада (Польша) өтүп жаткан эл аралык мелдеште Тынар Шаршенбековдон тышкары байгелүү орундарга Мээрис Жуманазарова, Айпери Медет кызы жана Жоламан Шаршенбеков жана Улан Муратбек уулу ээ болушту. Айпери Медет кызы кыз-келиндер күрөшүнөн 76 килограмм салмакта финалда Эстониядан келген тажрыйбалуу балбан кыз Эпп Мяэге жеңилип, күмүш медаль тагынды. 68 килограмм салмактк Мээрим Жуманазарова финалда кытайлык Фен Чжоуга утулуп, күмүш байге утту. Ал эми грек-рим күрөшүнөн 60 килограмм салмакта Жоламан Шаршенбеков жаракат алып калгандыктан финалда күрөшө алган жок, алтын байге жапониялык Кеничиро Фумитага берилип, Жоламан Шаршенбеков күмүш медаль тагынды. Күрөштүн бул түрүнөн 55 килограмм салмакта Улан Муратбек уулу коло байге алды.
