Бишкек шаардык милициясы тарабынан жашы жете элек кызды зордуктоого шектүү кармалды. Бул тууралуу Октябрь райондук ички иштер башкармалыгынын басма сөз кызматы билдирет.

Маалыматка ылайык, үстүбүздөгү жылы 28-августта Бишкек шаардык Октябрь райондук ИИБге С.У. аттуу кыз кайрылып, “А” аттуу жаранга карата чара көрүүнү өтүнгөн. Анын айтымында, ал 27-августта 23:00дөр чамасында “Алтын-Ордо” конушунда эркине каршы күч колдонуп, сексуалдык мүнөздөгү зомбулук аракеттерди жасап, андан кийин кызды үйүнө таштап, өзү белгисиз жакка кетип калган.

Аталган факт КР Жазык кодексинин 162-беренеси (“Сексуалдык мүнөздөгү зомбулук”) боюнча Октябрь райондук милициясынын кылмыштардын жана жоруктардын бирдиктүү реестрине катталган.

Октябрь РИИБинин кызматкерлери  шектүү катары 1995-жылы туулган С.А.ны карма, райондук соттун чечими менен убактылуу кармоочу абак жайына киргизилди.

Учурда иликтөө иштери уланууда. Эскерте кетсек, буга чейин досунун жигити тарабынан зордукталгандыгын айтып, 17 жаштагы өспүрүм кыз арыз жазгандыгы тууралуу маалымат таркаган.