Президент Садыр Жапаров 21-октябрда Бишкекте өткөн республикалык кеңешмеде өлкөнүн 2030-жылдын аягына чейинки социалдык-экономикалык өнүгүүсүнүн негизги максаттарын белгиледи.
Мамлекет башчысынын айтымында, алдыдагы беш жылда өлкөдө макроэкономикалык туруктуулукту камсыз кылуу, ички дүң продуктунун (ИДП) реалдуу өсүшүнүн орточо жылдык темпин кеминде 8% деңгээлинде сактоо жана чет өлкөлүк түз инвестициялардын агымын жыл сайын 20%га көбөйтүү көздөлүүдө.
Президент өткөн беш жылдыкта мамлекеттик институттарды калыбына келтирүү жана экономикалык өнүгүүнүн пайдубалын түптөө багытында иштер жүргүзүлгөнүн белгиледи. Эми негизги милдет жетишилген экономикалык өсүштү калктын бакубаттуулугун жогорулатууга багыттоо.
Мамлекет башчысы экономиканын туруктуу өнүгүүсүн камсыз кылуу үчүн экспортко багытталган сервистик-индустриалдык моделди иштеп чыгуу, инвестиция тартуу жана өндүрүштүн технологиялык деңгээлин жогорулатуу зарылдыгын айтты.
Министрлер Кабинетине жана борбордук мамлекеттик органдарга белгиленген максаттарды ишке ашыруу боюнча тиешелүү чараларды көрүү тапшырылды.
