Президент Садыр Жапаров бүгүн, 12-декабрда, Тынчтык жана ишеним эл аралык жылына (2025-жыл), Бейтараптыктын эл аралык күнүнө жана Түркмөнстандын туруктуу бейтараптыгынын 30 жылдыгына арналган «Тынчтык жана ишеним: туруктуу келечектин кызыкчылыгы үчүн максаттардын биримдиги» аттуу эл аралык форумда сөз сүйлөдү.

Мамлекет башчысы өз сөзүндө Кыргыз Республикасынын жана жеке өзүнүн атынан боордош түркмөн элине маанилүү дата – Түркмөнстандын туруктуу бейтараптыгынын 30 жылдыгына карата эң жакшы куттуктоолорун жолдоду. Ал Түркмөнстандын бейтараптуулук саясаты ички саясий туруктуулукту, коомдук ынтымакты камсыздап, өлкөнүн прогрессивдүү өнүгүүсүнө бекем негиз салганын баса белгиледи.

Садыр Жапаров Кыргызстан Түркмөнстандын чөлкөмдүк процесстерге, Борбор Азиянын жана коңшу аймактардын энергетикалык коопсуздугун чыңдоого кошкон салымын жогору баалай турганын ырастады.

Мындан тышкары, Президент Түркмөнстан тарабынан ишке ашырылып жаткан газ жана энергетикалык долбоорлор энергия менен камсыздоонун туруктуулугун жогорулатып, рынокторду кеңейтип, өз ара пайдалуу экономикалык кызматташтык үчүн кошумча мүмкүнчүлүктөрдү түзөрүн кошумчалады.

Бул контекстте ал биздин өлкөлөрдүн электр энергиясын жеткирүү жаатындагы ийгиликтүү кызматташтыгын белгиледи.

Ошондой эле Мамлекет башчысы транспорт жана логистика тармагында өз ара аракеттенүүнүн олуттуу потенциалы бар экенин белгилеп өттү.

Буга байланыштуу Президент Кыргызстан мультимодалдык каттамдарды өнүктүрүүгө, учурдагы коридорлорду кеңейтүүгө, жаңы биргелешкен логистикалык чынжырларды түзүүгө катышууга даяр экенин баса көрсөттү.

“Биздин өлкөлөр үчүн транспортту модернизациялоо жана мультимодалдык маршруттарды өнүктүрүү негизги милдеттерден болуп калат”, — деди Садыр Жапаров.

Бул контекстте ал Кытай–Кыргызстан–Өзбекстан темир жолун куруу долбоорун ишке ашыруу, ошондой эле энергетика тармагында Камбарата ГЭС-1 куруу долбоору өзгөчө мааниге ээ болорун баса белгиледи.

«Албетте, бул жана башка ири долбоорлор өз ара пайдалуу кызматташуунун мүмкүнчүлүктөрүн кеңейтип, өлкөлөрүбүздүн өнүгүүсүнө жаңы келечектерди ачат», — деп белгиледи Президент.

Ал Кыргызстан Түркмөнстандын 2025-жылды Эл аралык тынчтык жана ишеним жылы деп жарыялоо жөнүндө БУУнун резолюциясын кабыл алуу демилгесин жогору баалай турганын баса белгиледи. Кыргызстан анын активдүү колдоочусу жана тең автору болду, анткени ал эл аралык мамилелердин түпкү принциптерин – диалогду, өз ара түшүнүшүүнү жана мамлекеттердин эгемендүүлүгүн урматтоону бекемдөөгө багытталган.

Садыр Жапаров ошондой эле Түркмөнстандын уникалдуу аймактык формат — Борбордук Азия мамлекеттеринин башчыларынын консультативдик жолугушуусун чыңдоодогу активдүү ролун белгиледи.

Ал бул түз жана ишенимдүү диалог механизми жалпы чакырыктарды талкуулоо жана макулдашылган ыкмаларды иштеп чыгуу үчүн маанилүү аянтча болуп калганын, бул өзгөчө азыркы шарттарда талап кылынарын баса белгиледи.

“Биздин өлкөлөрдүн алдында жалпы максат – биргелешип тынчтыкты бекемдөө, чыр-чатактарды алдын алуу жана туруктуу өнүгүүгө көмөктөшүү турат деп ишенебиз”, — деп белгиледи Мамлекет башчысы.

Мындан тышкары, ал Кыргыз Республикасы туруктуулукту чыңдоого багытталган эл аралык аракеттерди ар дайым колдой турганын баса көрсөттү.

Президент баса белгилегендей, быйыл Өзбекстан жана Тажикстан менен мамлекеттик чек араларды юридикалык жактан тактоо ийгиликтүү аякташы — бул жолдогу маанилүү кадам болуп, региондук коопсуздукту камсыздоого олуттуу салым кошту жана биздин тынчтыкты, ынак коңшулукту бекем туткан саясатка берилгендигибизди тастыктады.

Президент Садыр Жапаров сөзүнүн аягында өлкөлөрдүн биргелешкен аракеттери мындан ары да Борбор Азия аймагында тынчтыкты жана ишенимди бекемдөөгө, коңшулаштык мамилелерди өнүктүрүүгө өбөлгө болорун белгиледи.