26-апрелде Түркиянын Сакарья шаарында Түрксөй Эл аралык уюмунун жана Кыргызстандын Стамбул шаарындагы Башкы консулдугунун колдоосу менен, Сакарья Кыргыз биримдигинин демилгеси аркылуу салтка айланган «Достук» футбол турнири болуп өттү.
Мелдешке Түркиянын 16 шаарынан келген 16 студенттик курама командалар катышып, достукту жана ынтымакты чыңдоо максатында атаандаштыкта күч сынашты. Турнирдин жыйынтыгында 1-орунду Конья шаарынын командасы, 2-орунду Стамбул жаштары, ал эми 3-орунду Карабүк университетинин студенттери камсыздашты.
Ошондой эле «Эң мыкты дарбазачы» жана «Эң мыкты оюнчу» номинациялары боюнча өзгөчөлөнгөн катышуучуларга белектер жана сертификаттар тапшырылды. Иш-чаранын жүрүшүндө Түрксой уюму тарабынан кызыктыруучу белектер, ал эми консулдук тарабынан кубок ыйгарылды.
Бул иш-чара чет мамлекетте билим алып жаткан кыргыз студенттеринин достугун, биримдигин бекемдөөгө багытталган. Кийинки турнир 2026-жылы Конья шаарында өтмөкчү.
