Бүгүн Ош шаарында Салык кызматынын төрагасы Алмамбет Шыкмаматов акциздик маркаларды көзөмөлдөө боюнча рейддик иш-чара өткөрдү.
Рейдге Президенттин Иш башкаруучусу Каныбек Туманбаев, Ош шаарынын мэри Жеңишбек Токторбаев катышты. Шыкмаматов Ош шаарынын жаңы базарындагы соода түйүндөрүн кыдырып, сатуучу жайларды көрүп чыкты.
Салык кызматынын төрагасы акциздик продукциялар салыктык түшүүлөрдү камсыздап, калктын ден соолугун сапатсыз продукциялардан коргой турганын баса белгиледи.
Жыйынтыгында базарда акциздик маркаларга байланыштуу салык мыйзамдарынын бузулушу аныкталды. Айрым кант кошулган суусундуктарда акциздик маркалар жок болуп чыкты. Төрага мыйзам бузгандарга карата тиешелүү чараларды көрүүнү тапшырды.
Рейддик кыдыруунун жүрүшүндө шаар ичиндеги соода түйүнүндөрүнүн биринде дүң сатылган суусундуктардын акциздик маркалары белгиленген талаптарга туура келбеген учурлар катталды. Мыйзам бузуулардын натыйжасында продукция жүгүртүүдөн алынды.
