Мамлекеттик салык кызматынын төрагасы Алмамбет Шыкмаматов Италияга болгон иш сапарынын алкагында Виченца шаарында өткөн «Vicenzaoro» эл аралык зергерчилик көргөзмөсүнө барды.
Иш-чаранын жүрүшүндө Салык кызматынын төрагасы зергерчилик тармагындагы жаңы багыттар, колдонулуп жаткан материалдар жана технологиялар менен таанышып, италиялык алдыңкы зергерчилик компанияларынын жетекчилери жана өкүлдөрү менен жумушчу жолугушууларды өткөрдү.
Алмамбет Шыкмаматов Bvlgari тобунун жана LVMH италиялык бренддеринин туруктуу өнүгүү жана корпоративдик социалдык жоопкерчилик боюнча директору Элеонора Риццуто менен жолугушту. Жолугушууда Салык кызматынын төрагасы Алмамбет Шыкмаматов Кыргыз Республикасындагы зергерчилик тармагынын учурдагы абалы, жүргүзүлүп жаткан реформалар жана зергерчилик өндүрүшүн өнүктүрүүгө багытталган мамлекеттик колдоо чаралары тууралуу маалымат берди.
Кыргызстандын баалуу металлдарды жана асыл таштарды кайра иштетүү жаатындагы потенциалына, ошондой эле чет элдик инвестицияларды тартуу жана ири эл аралык бренддер менен кызматташтыкты өнүктүрүү мүмкүнчүлүктөрүнө өзгөчө көңүл бурулду.
Жолугушуунун жыйынтыгында тараптар кыргызстандык адистерди Bvlgari академиясынын базасында зергерчиликке окутуу мүмкүнчүлүгүн талкуулашты. Ошондой эле зергерчилик жабдууларын өндүрүүчүлөрдүн жана экспорттоочулардын ассоциациясынын президенти Массимо Полеро мырза менен жолугушуу болуп өттү. Анда зергерчилик тармагында өз ара кызматташуунун маселелери талкууланды.
Алмамбет Шыкмаматов биргелешкен иш-аракеттердин багыттарын сунуштап, анын ичинде Кыргыз Республикасынын AFEMO компаниясынан зергер буюмдарын толук циклде өндүрүүнү уюштуруу үчүн жабдууларды сатып алуусу тууралуу сунуш киргизди.
Мындан тышкары, Trevi Group S.r.l. жана Damiani Group компаниялары менен өзүнчө эки тараптуу жолугушуулар өткөрүлдү.
Талкуунун жүрүшүндө тараптар зергерчилик тармагында заманбап технологияларды жана жабдууларды колдонуу маселелерин, анын ичинде лабораториялык шарттарда асыл металлдарды анализдөө чечимдерин, ошондой эле зергерчилик буюмдарын даярдоодо жана кайра иштетүүдө колдонулган технологияларды карап чыгышты.
Ошондой эле алдыңкы италиялык технологияларды Кыргыз Республикасына ыңгайлаштырып киргизүү, аларды ата мекендик зергерчилик ишканаларында жана профилдик лабораторияларда практикалык колдонуу мүмкүнчүлүктөрү талкууланды.
Жолугушуунун соңунда рынокту изилдөө жана баалоо максатында италиялык зергер буюмдарын өндүрүүчүлөрдүн Кыргыз Республикасына келүү сапары тууралуу макулдашууга жетишилди. Ошондой эле мындан аркы тыгыз кызматташтыкты өнүктүрүү жана биргелешкен долбоорлорду ишке ашыруу боюнча кошумча сүйлөшүүлөр жүргүзүлөт.
Белгилей кетсек, Vicenzaoro эл аралык зергерчилик көргөзмөсү — зергерчилик буюмдарды, асыл таштарды, жабдууларды жана технологияларды көрсөтүүгө арналган алдыңкы B2B кесиптик аянтча болуп саналат. Ал ишкердик байланыштарды түзүүгө, тажрыйба алмашууга, дүйнөлүк тренддерди изилдөөгө жана зергерчилик тармагында эл аралык кызматташтыкты өнүктүрүүгө багытталган.
