Сокулук районунда сексуалдык кызмат көрсөткөн жайларды аныктоо максатында «Притон» аталышындагы рейддик иш-чаралар жүргүзүлдү. Бул тууралуу Чүй ОИИБден билдиришти.
Маалыматка ылайык, 9-августта «Притон» аталышындагы рейддик иш-чара жүргүзүлдү. Бул иш-чаранын алкагында, сексуалдык кызмат көрсөтүү менен алектенген жарандарды аныктоо максатында Сокулук районунун аймагындагы мончолор жана сауналар текшерүүгө алынды. Рейд учурунда Сокулук айылындагы сауналардын биринен сексуалдык кызмат көрсөткөн жарандар аныкталган.
Аталган факт Сокулук районунун ички иштер бөлүмүнө катталып, тергөөгө чейинки текшерүү иштери башталган. Сокулук РИИБге 23-40 жаштардагы 7 жаран алынып келинип, суракка алынып, тергөө амалдары жүргүзүлгөн.
Учурда сауна ээлеринин жана сексуалдык кызмат көрсөтүүнү уюштургандардын жоопкерчилиги каралууда.
