Ак-Ордо-3 конушунда болгон жол кырсык боюнча кылмыш иши козголду. Бул тууралуу 7-каналга Чүй ОИИБден билдиришти.
«Оор жүк ташуучу унаанын 1991-жылы туулган айдоочусу убактылуу кармоочу жайга киргизилди. Учурда тергөө уланууда»,- дешти.
Эскерте кетсек, 19-июлда Сокулук районуна караштуу Ак-Ордо-3 конушунда үрөй учурган жол кырсыгы катталган. Анда, №169 маршрутка жолдон токтоп жүргүнчүлөрдү салып жаткан учурда чоң жүк ташуучу унаа маршрутканы артынан сүзгөн. Кырсыктын кесепетинен 23 адам жаракат алып, 1 аял каза болгон.
