УКМК фейсбукта “Сейит Ажыкан” аттуу колдонуучу Мамлекеттик бажы кызматында Криминалдык авторитет Камчы Көлбаев жана Раим Матраимов менен байланышы үчүн кызматынан бошотулгандардын ордуна президенттин жана УКМКнын төрагасынын адамдары алынып жатат деп тараткан маалымат чындыкка дал келбесин билдирет.
«Бош орундарга кабыл алуу конкурстун жана кадрдык резервдин негизинде жүргүзүлөт. “Сейит Ажыкан” аккаунтунун колдонуучусу РФнын жараны, Талас облусунда 1979-жылы туулган, улуту кыргыз, Ажыканов Сейитбек Кадыркулович экени аныкталды. Ал учурда АКШда жашайт. “Тилекмат Куренов” деп таанылган Кудайберди уулу Тилекматтын жакыны жана өнөктөшү. Ажыкановго карата башка колдо болгон материалдардын негизинде Кыргызстандын аймагында массалык баш аламандык уюштурууга чакыруу боюнча тергөө иш-чаралары жүргүзүлүүдө»,- деп берилет маалыматта.
УКМК атайылап жалган маалымат таратуу үчүн Кыргызстандын мыйзамдарына ылайык кылмыш жоопкерчилиги каралганын эскертет.
