“Актилек-авто унаа” көзөмөл-өткөрүү пунктунда Кыргызстандын аймагына тиешелүү лицензиясы жана уруксат берүүчү документтери жок спирт ичимдиктерин мыйзамсыз ташып келүү аракетине бөгөт коюлду. Бул тууралуу УКМКнын басма сөз кызматынан билдиришти.
Текшерүүнүн жүрүшүндө өлкөнүн аймагында спирт ичимдиктерин сатуу жана сактоо боюнча ыйгарым укуктуу мамлекеттик органдын лицензиясы жок ишкердик кылган субъекттердин бири тарабынан Кыргызстандын аймагына алынып келингендиги аныкталды.
“Мерседес-Бенц Спринтер” үлгүсүндөгү унаа кармалып, алдын ала эсептөөлөр боюнча ташылып келинген алкоголдун жалпы көлөмү 1800 литрге жакын.
Учурда товарлардын келип чыгышын жана мыйзамсыз иш-аракеттерге тиешеси бар адамдарды аныктоого багытталган текшерүү иштери жүргүзүлүүдө.
