Сузак районуна караштуу Миң-Өрүк айылындагы Н.Алыкулов атындагы мектепти окуу жылынын башталышында пайдаланууга берүү пландалууда. Бул утуралуу Курулуш, архитектура жана турак жай-коммуналдык чарба министрлигинен билдиришти.
Маалыматка ылайык, билим берүү уюмунун курулуш иштери 2024-жылы башталып, республикалык бюджеттин эсебинен каржыланууда.
Жаңы мектеп 750 орунга ылайыкталып 4 блоктон турат. Долбоор боюнча үч кабаттуу окуу корпус, өтмө галерея, лабораториялар, компьютердик класс, азык-түлүк сактоочу жайы бар ашкана, актовый зал, дарыгердин кабинети жана спорт зал каралган. Жалпы аянты 8234 чарчы метрди түзөт.
