Соцтармактарда Сузак районунун Октябрь айылындагы №1 «Кенжетай» балдар бакчасынын тарбиячылары балдарды сабап жаткан видео тараган. Балдардын сабалышы боюнча окуя териштирилет.
Бул боюнча Билим берүү министрлиги тиешелүү кызматкерлерге чара көрөрүн билдирди.
«Балдар бала бакчада жүргөн учурда алардын ден соолугу жана өмүрүнүн коопсуздугу үчүн ар бир кызматкер жоопкер. Балдарга зордук-зомбулук көрсөтүүгө жол берилбейт жана катуу тыюу салынат. Ошондуктан жогорку окуя тыкыр иликтенип, жооптуу кызматкердин баарына катуу чаралар көрүлөт», — деп жазылган министрлик тараткан маалыматта.
Ошондой эле бул окуя Сузак РИИБинде катталып, бирок фактыны прокуратура текшерип жаткандыктан топтолгон материалдар Жалал-Абад облустук прокуратурасына жөнөтүлгөнү кабарланды.
