Жер титирөөдөн улам Бишкек – Нарын – Торугарт унаа жолунун 410-чакырымында тоо боорунан топурак, таштар кулады. Бул тууралуу Транспорт жана коммуникациялар министрлиги билдирет.
Жолчулар унаа кыймылына тоскоолдук жараткан таштарды колдун күчү жана атайын техниканын жардамы тазалап, жумуштар түнкү саат 2:20да жыйынтыкталды.
“Өлкөнүн башка унаа жолдорунда мындай көрүнүштөр катталган жок”, — деп айтылат маалыматта.
Белгилей кетсек, Сейсмология институтунун маалыматына ылайык, бүгүн түнкү саат 00:09да Кытай Эл Республикасынын аймагында күчү 8 баллга жеткен жер титирөө катталды. Алдын ала маалымат боюнча жер титирөөдөн жабыркагандар жана кыйроолор катталган жок.
