Түндүк Корея Токиодогу Жайкы Олимпиада оюндарына катышуудан баш тартты. Бийлик өкүлдөрү чечимди спортчуларын COVID-19 коронавирус пандемиясынан сактап калуу аракети менен түшүндүрдү. Бул тууралуу Yonhap агенттиги жазып чыкты.
«Түндүк Корея бийлиги коронавируска байланыштуу спортчулардын ден-соолугуна кам көрүү максатында 32-Олимпиада оюндарына катышпай турууну чечти», — деп айтылат Спорт министрлигинин билдирүүсүндө.
Мындай чечим Кореянын Олимпиадалык комитетинин 25-мартта Пхеньянда өткөн жыйынында кабыл алынды.
Март айынын башында Түштүк Кореянын президенти Мун Чжэ Ин Токио Олимпиадасы Пхеньян менен диалогду калыбына келтирүүгө, ошондой эле Түндүк Кореянын АКШ жана Япония менен мамилесин калыбына келтирүүгө салым кошо алат деп билдирген.
Токиодогу Олимпиада оюндары пандемияга байланыштуу бир жылга жылдырылган, ал ушул жылдын 23-июлунан 8-августуна чейин өтөт. 2021-жылы март айында уюштуруучулар Олимпиадага башка өлкөлөрдөн келген күйөрмандарды киргизбөө чечимин кабыл алышкан.