21-февралда жергиликтүү убакыт боюнча cаат 19:00гө карата Түркияда жер титирөөдөн каза болгондордун саны 42 310 адамга жетип, 110 000ден ашуун адам жарадар болду.
Түркиянын президенти Режеп Тайып Эрдоган, Жалпы турак-жай башкармалыгы (TOKİ) март айында 11 облуста туруктуу турак жайларды куруп баштаарын айтты. Жалпысынан 300 миң турак жай курулат:
• Хатайда 40 126
• Кахраманмарашта 45 067
• Адыяманда 25 882
• Газиантепте 18 544
• Малатьяда 44 770
• Османиеде 9 550
• Диярбакырда 6 000
• Шанлыурфада 3 000
• Элязыгда 3750
• Аданада 2500
• Килисте 250
Өзгөчө кырдаалдар башкармалыгынын (AFAD) маалыматы боюнча Хатайдагы акыркы жер титирөөдөн 6 адам каза болду. Кечээ Хатайда болгон жер титирөөдөн кийин дагы 90 жер силкинүү (афтершок) болду. Жалпысынан Кахраманмараш жана Хатайда болгон жер титирөөлөрдөн кийин 7242 жер силкинүү болгон (афтершок), анын 41и 5-6 баллга, 450сү 4-5 баллга жеткен.
Кырсык болгон аймактардагы Кыргызстандын жарандарына жардам көрсөтүү үчүн Кыргызстандын Түркиядагы чет өлкөлүк мекемелеринде түзүлгөн жана күнү-түнү иштеген ыкчам штабдардын иши уланууда.
