ТҮРКСОЙ эл аралык түрк маданияты уюму Кыргызстандын Министрлер Кабинетине 2028-жылга карата эки ири демилге менен кайрылууну пландап жатат. Бул тууралуу уюмдун башкы катчысы Султан Раев билдирди.
Биринчи демилге залкар жазуучу Чыңгыз Айтматовдун 100 жылдыгына карата 2028-жылды түрк дүйнөсүндө «Чыңгыз Айтматов жылы» деп жарыялоону сунуштайт.
Экинчи сунуш 2028-жылы Талас шаарына түрк дүйнөсүнүн маданий борбору макамын берүү демилгесине байланыштуу.
Белгиленгендей, Талас облусу «Манас» эпосунун жана дүйнөгө белгилүү жазуучу Чыңгыз Айтматовдун мекени болуп саналат.
ТҮРКСОЙдун катчылыгы аталган сунуштарды расмий түрдө Кыргызстандын өкмөтүнө жөнөтүү ниетинде экенин билдирди.
