Талас шаарына адам сөлөкөтүндөгү 7 жана ит сөлөкөтүндөгү 3 робот жеткирилди. Бул тууралуу Талас шаарынын мэри Нургазы Асылбеков билдирди.
Анын айтымында, социалдык тармактарда бийлеп жаткан роботтордун Таласка келгени чын. Алар шаардагы «Баластан» балдарды өнүктүрүү борборуна жеткирилген.
Мэрдин айтымында, борбордун долбоорунда IT тармагына өзгөчө басым жасоо каралгандыктан, роботтор да окуу процессине киргизилген.
Белгилей кетсек, Кыргызстандын Эгемендүүлүгүнүн 35 жылдыгына арналган негизги майрамдык иш-чаралар 11–12-сентябрда Талас шаарында өтөт.
Эске салсак, Эгемендүүлүк күнү жыл сайын 31-августта белгиленет. Бирок быйыл Бишкекте Шанхай кызматташтык уюмунун саммити жана Дүйнөлүк көчмөндөр оюндарынын ачылыш аземине байланыштуу негизги майрамдык иш-чаралар башка күнгө жылдырылган.
