Таласта убактылуу кармоочу жайда текшерүү жүргүзүлүп, көптөгөн мыйзам бузуулар бар экендиги аныкталды. Бул тууралуу кыйноолордун алдын алуу улуттук борборунун маалыматы билдирди.
Маалыматка ылайык, убактылуу кармоочу жайдын жуунуучу бөлмөсү иштен чыкканы, душ бөлмөлөрү начар абалда, колго жасалган суу жылыткычтар техникалык талаптарга жана стандарттарга жооп бербегендиги, аны колдонууда адамдардын өмүрүнө жана ден соолугуна коркунуч жаралышы мүмкүн экендиги текшерүү учурунда аныкталган.
Абактагылар нымдуулукка, кир төшөнчүлөргө, керебеттердин жана жууркан-төшөктүн жоктугуна арызданышкан.
«Бардык мыйзам бузуулар системалуу, кыйноо жана адамдык кадыр-баркты басмырлоочу мамиле катары кабыл алынууга тийиш», — деп белгилеген аймактык өкүлчүлүгүнүн башчысы Нурлан Абдыраимов.
Ошондой эле учурда мыйзам бузуулар боюнча акт түзүлүп, ал дагы Талас облусунун прокуратурасына жөнөтүлдү.
Эскерте кетсек, 14-апрелде жабык мекемеде жогорудагы көйгөйлөр боюнча буга чейин облустук прокуратурага кайрылуу жөнөтүлгөн. Көзөмөлдөөчү орган убактылуу кармоочу жайдагы мыйзам бузууларды четтетүү боюнча тапшырма берип, бирок баары өзгөрүүсүз калган.
