Улуттук коопсуздук комитетинин төрагасы Камчыбек Ташиев бүгүн, 20-июлда өкмөттүн жыйынында сөз сүйлөп жатып, эки жылда өлкөнүн коргонуусуна канча каражат жумшалганын айтты.
«Аскердик техникаларды жана курал-жарактарды масштабдуу түрдө жаңыладык. 2005-2020-жылдары бул багытка 3-5 миллиард гана сом жумшалса, 2021-жылы 32 миллиард сом жумшалган. 2022-жылы 53 миллиард сом жумшалган. Эки жылда 85 миллиард сомдон ашты. Ал эми быйылкы жарым жылдыкта 40 миллиард сомдон ашык каражат бөлүндү. Тактап айтканда, 2 жарым жылда 120 млрд сомдон ашык бөлүндү. Бул өтө масштабдуу жаңылануу деп эсептелет»,- деди ал.
