Бүгүн Министрлер кабинетинин төрагасынын орун басары – Улуттук коопсуздук мамлекеттик комитеттин төрагасы Камчыбек Ташиев дары-дармек менен камсыздоо жаатындагы абалды талкуулоо боюнча мекемелер аралык комиссиянын кеңешмесин өткөрдү. Бул тууралуу Министрлер кабинетинин басма сөз кызматы билдирди.
Кеңешменин жүрүшүндө дары-дармек менен камсыз кылуу чөйрөсүндөгү кырдаалдын актуалдуу маселелери талкууланды. Камчыбек Ташиев дары-дармектин баасына, фармацевттик бизнестин көйгөйлөрүнө, медикамент аткезчилигине, тиешелүү мамлекеттик органдардын бюрократиялык тоскоолдуктарына токтолуп өттү.
Кеңешменин жыйынтыгында дары-дармектердин рыноктук наркын түзүү ыкмаларын кайрадан карап чыгуу, анын катарында калк үчүн өтө маанилүү дары-дармектин баасын төмөндөтүү чечими кабыл алынды. Ошондой эле тиешелүү мамлекеттик органдардын жетекчилерине чайкоочулукка жол бербөө үчүн натыйжалуу чараларды иштеп чыгуу тапшырмасы берилди.
