Кыргызстанда тигүү тармагын колдоо үчүн жеңилдетилген насыя берүү уланууда. Экономика жана коммерция министри Бакыт Сыдыков билдиргендей, 30-мартка карата бул багытта дээрлик 1,5 млрд сом кредит берилди.
Программа пайыздык чендерди субсидиялоо аркылуу ишкерлерге жеңил шарт түзөт. Расмий иштеген ишкерлер насыяны тоскоолдуксуз алып жатышканы белгиленди. Бирок көмүскөдө иштегендер документтердин жоктугу, салык отчетторунун толук эместиги жана мурдагы карыздардын кечиктирилиши сыяктуу себептерден улам кредит ала албай жатышат.
Жыйында ишкерлерге Бирдиктүү салык декларациясын өз убагында тапшыруу маанилүү экени айтылып, банктарга арыздарды кароону ыкчамдатуу сунушталды.
