Токио 2021 жайкы Олимпиадасы бүгүн, 23-июль кечки саат 17:00дө башталат. Кыргызстандан ага 16 спортчу катышат. Олимпиаданын ачылуу аземи пандемияга байланыштуу, бир катар чектөөлөр менен өтөөрү айтылган. Аны чагылдырууга Кыргызстанда атайын жаңы телеканал ачылган.
КТРКнын продюсери Шайырбек Арапов, «Азаттыкка» берген маегинде Коомдук телерадиокорпорациясынын алдында «КТРК-Спорт-2»- деген канал ачылганын кабарлаган.
Эми мекендешетер катышкан эл аралык Олимпиада оюндарын, КТРК-Спорт жана КТРК-Спорт-2 телеканалдарынан тандап көрүү мүмкүнчүлүгү бар.
Олимпиадага дүйнөнүн 200дөн ашуун мамлекетинен 12 миңден көбүрөөк спортчу катышууда. Кыргызстандык спортчулар 24-июлдан баштап күч сынаша баштайт. Жабылуу аземи 8-августта болот.