Токтогулда мал уурулук менен алектенген капитан кармалды. Бул тууралуу Жалал-Абад ОИИБ билдирет.
25-апрелден 3-майга чейинки аралыкта Токтогул районунун аймагында беш факты мал уурулук учурлары орун алган. Мал уурулук беренеси менен кылмыш иши козголуп, тиешелүү кызматтарга тапшырмалар берилген.
Тергөөнүн жүрүшүндө жалпысынан 5 баш уй, 1 баш жылкы уурдалып, жабырлануучуларга 300 000 (үч жүз ) миӊ сомдук материалдык чыгым келтирилгендиги такталган.
Жүргүзүлгөн ыкчам иликтөө иш-чараларынын жыйынтыгында, Токтогул районунун Өзгөрүш айылынан өзүн “Бишкек шаарынын 1-Май райондук милициясында иштейм” деп элдердин ишеничине кирип, милициянын формасын кийип жана ок атуучу куралы менен жүргөн жеринен шектүү катары Токтогул районунун 1994-жылкы тургуну А.У. кармалып тергөө кызматына камсыздалды.
Шектүүнүн баш коргоо чарасы Токтогул райондук соту тарабынан каралып, 1 айлык мөөнөткө камакка алуу түрү тандалган. Учурда бул кылмыш иштери боюнча тергөө амалдары улантылууда.
