Улуттук коопсуздук боюнча мамлекеттик комитет (УКМК) “Ак-Тилек автожол” өткөрмө пунктунда жүк ташуучу унааларды мыйзамсыз өткөрүп туруу фактысын аныктап, бөгөт койду.
Маалыматка ылайык, чек ара кызматынын жана салык кызматынын ЕАЭБ боюнча башкармалыгынын кызмат адамдары коммерциялык жүктөрдү ташыган унаалардын Кыргызстандын аймагына тоскоолдуксуз кирүүсүн камсыздап турушкан. Ошондой эле, расмий документтерде аларды бош унаалар катары катташкан. Бул үчүн алар акча алып турушкан.
Тергөөнүн жыйынтыгында жогорку кылмыштарга шектелип, Мамлекеттик чек ара кызматынын аскер кызматкери (Э.у.Ч), Мамлекеттик салык кызматынын ЕАЭБ боюнча башкармалыгынын Түндүк аймактык кызматкерлери (Ж.М.Т. жана О.К.И) жана жүк ташуучу унаанын айдоочусу (Н.М.С.) кармалып, УКМКнын убактылуу кармоочу жайына киргизилди.
Учурда бул ишке тиешеси бар башка адамдарды аныктоо боюнча ыкчам-тергөө иш-чаралары улантылууда.
