УКМК «Ирак жана Левант Ислам мамлекети» эл аралык террористтик уюмунун жактоочусун кармады.
Кыргызстандын 22 жаштагы жараны үгүтчүлөрдүн таасири менен аталган уюмду колдой баштаган. Сирияга кетүүгө камынып, ИМ «халифине» ант берген бир нече видеокайрылуу жаздырган. Мындан тышкары, уюм тууралуу маалыматтарды, террорчулукту актап, теракт жасоого үндөгөн роликтерди фейк аккаунттар аркылуу таратууга шектелип жатат.
УКМК террорчулукту жайылтуу бул сөз эркиндиги эмес, кадимки кылмыш экенин эскертүүдө. Атайын кызмат жарандарды ДЭУнун радикалдуу дааватчыларынын жана жалдоочуларынын тармактарына түшүп калбоо үчүн сак болууга, диний билимдерди анык булактардан алууга чакырат.
