Ош шаарындагы адам өлтүрүүгө шектелген дагы бир жаран кармалды. Бул тууралуу ИИМдин басма сөз кызматы билдирди.
Маалыматка ылайык, издөөдө жүргөн 1991-жылы туулган Нурбек Чубаков аттуу Өзгөн районунун тургуну бүгүн Ош облусунун аймагынан кармалган.
«Өзгөчө оор кылмышка тиешеси барларды кармоо жана кылмыш ишин толук ачуу боюнча комплекстүү ыкчам-иликтөө иш-чаралары улантылууда»,- деп бериплет билдирүүдө.
Эскерте кетсек, 12-январдан 13-январга караган түнү Ош шаарында уюшкан кылмыштуу топтун мүчөлөрүнө кол салуу болуп, бирөө каза тапса, экинчиси ооруканага түшкөн. Кечээ, 13-январда аталган кылмышты уюштурду делип кримтөбөл “Женго” кармалып, анын шериктери, кылмышка түздөн-түз катыштыгы бар үч жаранга издөө жарыяланган. Ал эми, бүгүн, 14-январда аталган кылмышка шектелип дагы эки жаранга издөө жарыяланган. Кечээ, 13-январда издөө салынган 2 жаран бүгүн Чүй облусунун аймагынан кармалган.
