Улукбек Кармышаков Кыргыз Республикасынын Министрлер Кабинетинин төрагасынын орун басары – экономика жана финансы министри болуп дайындалды. Бул тууралуу президенттин аппаратынын басма сөз кызматы билдирди.
Президент Садыр Жапаров кол койгон Жарлыкка ылайык, 2021-жылдын 11-апрелинде референдум аркылуу кабыл алынган «Кыргыз Республикасынын Конституциясы жөнүндө» Кыргыз Республикасынын мыйзамынын 4-беренесинин негизинде Кармышаков Улукбек Тойчуевич мурда ээлеген кызматынан бошотулуп, Кыргыз Республикасынын Министрлер Кабинетинин төрагасынын орун басары — экономика жана финансы министри болуп дайындалды.
