Премьер-министр Улукбек Марипов Бишкекте өтүп жаткан айыл чарба жарманкесин кыдырып, баалар менен таанышты. Бул тууралуу ал өзүнүн фейсбук баракчасында жазды.
«Өсүмдүк майы жана кумшекер өндүрүүчүлөр менен түз келишим түзүү боюнча сүйлөшүүлөр жүрүп жатат. Бул жеке менин көзөмөлүмдө. Мындан сырткары эт азыктарынын баасын көзөмөлгө салуу боюнча да иштер аткарылып жатат. Бизде сатылып жаткан товарлардын 85 пайызы чет өлкөлөрдөн импорт болуп келет экен, биз бул көрсөткүчтү 50 пайызга түшүрүүгө аракет кылып жатабыз», — деди Марипов.
Мындан сырткары Марипов тургундарды ата мекендик өндүрүштөгү азыктарды көбүрөөк колдонууга чакырды.
«Өзүбүздөн өндүрүлгөн товарларды көбүрөөк колдонууга чакырам. Мисалы той-аштарда сөзсүз түрдө банан колдонобуз. Банан бизде таптакыр өспөйт. Ошондуктан алма, сабиз сыяктуу жашылча-жемиштерди колдонууга үндөп келем«, — деди Марипов.
