Бишкекте өзүн милиция кызматкери катары тааныштырып, жасалма документтерди колдонуу менен адамдардан акча алып жүргөн жаран кармалды. Бул тууралуу ИИМ билдирди.
Маалым болгондой, шектүү өзүн Патрулдук милициянын кызматкеримин деп тааныштырып, унааны айып короодон чыгарып берем деген шылтоо менен бир жарандан 60 миң сом алып, анын ордуна жасалма документ берген.
Бул факты боюнча кылмыш иши козголуп, шектүү кармалды. Ал мурда соттолгон 1992-жылы туулган жаран экени аныкталды.
Тинтүү учурунда анын жашаган жеринен айып короодон унаа чыгарууга байланыштуу жасалма бланктар жана документтер табылган.
Учурда тергөө уланууда. Укук коргоо органдары шектүүнүн ушул сыяктуу башка фактыларга тиешеси бар-жогун аныктап жатышат.
