Өзбек Республикасынын “П”. аттуу жараны кыргызстандын аймагына аткезчилик жолу менен мыйзамсыз прекурсор химиялык заттарын өткөрүп жүргөн жеринен кармалды. Бул тууралуу Баткен ОИИБнын Басма сөз кызматы билдирди.
Маалыматка ылайык, Пульгон айылынын Шар-Шара участкасында “Hyundai Porter” үлгүсүндөгү унаадан 28 даана 20 литрлик желим идиште өзгөчө жыты бар, химиялык затка окшогон суюктукту Кадамжай районунун Халмион айылынын 40 жаштагы К.Б. жана 29 жаштагы И.И. аттуу жарандар Ош шаарына алып бара жаткан жеринен кармалган.
Иликтөө иштеринин натыйжасында Өзбек Республикасынын 42 жаштагы М.П. аттуу тургуну менен Жалал-Абад облусунун 66 жаштагы А.К. аттуу тургуну кармалып, убактылуу кармоо жайына киргизилген.
Алынган суюктукка соттук-химиялык экспертиза дайындалып, экспертизанын корутундусунда 682 кг прекурсор заты болуп аныкталды.
Учурда тергөө иштери бүтүп, кылмыш иши Кадамжай райондук сотуна жөнөтүлдү.