Өзбекстанда жергиликтүү бийликке протест катары райондук акимчиликке кой айдап барган жаран он күнгө камалды. Бул тууралуу жергиликтүү маалымат кызматы билдирди.
Маалыматка ылайык, ал 17-июнда «Mubosher Laziz Azizbek fayz» фермасынын койлорун Наманган облусунун Янгикурган райондук акимиятынын имаратына айдап барган.
Район жетекчилиги кой чарбачылыгы үчүн жер бөлүп бербегендиктен чабан ушул жол менен нааразылык билдирген.
Облустук ички иштер башкармалыгы ал Админстративдик кодекстин бир канча беренеси менен айыптуу деп табылганын билдирди. Фермер район борборундагы жашылдандыруу иштерине залака тийгизди деп он күнгө камалды жана айыппул салынды.
Белгилей кетсек, мурдараак Самарканд облусунун Нурабад районунун акимчилигинин алдына бир жарым миңдей кой айдап келишкен эле.