Германиянын экс-канцлери Ангела Меркель пенсияга чыккандан кийинки алгачкы күнүн супермаркетте соода кылуу менен өткөрдү. Бул тууралуу маалыматты экс-канцлердин эс алуусуна кызыккан булактарга таянып, чет элдик басылмалар жазып чыгышты.
Маалыматка караганда, Ангела Меркель таң эрте саат 08:30 чамасында жол тыгынына карабастан кеңсесине барган. Андан соң супермаркетке барып соода кылган. Экс-канцлерди супермаркетте жан сакчы коштоп жүргөнүн, бирок ал азык-түлүк салуучу арабаны өзү түртүп жүргөнүн көрүүгө болот. Сүрөт социалдык тармактарга тарап, кызуу талкуу жаратып жатат. Көпчүлүк Ангела Меркелдин жөнөкөйлүгүнө баа берген.
Ал буга чейинки маектеринин биринде кызматын тапшырган соң уктап эс аларын билдирген болчу.
Эске салсак, Ангела Меркель канцлердик кызматын 8-декабрда Олаф Шольцго тапшырып берген. Ал бул кызматты 16 жыл аркалады.
