Жалал-Абад шаарындагы аз камсыз болгон 68 үй-бүлөгө ишкердикти баштоо үчүн 100 миң сомдон берилет. Бул тууралуу шаардык мэриядан билдиришти.
Маалыматка ылайык, бүгүн Жалал-Абад шаардык мэриясынын кичи жыйындар залында “Финансылык сабаттуулук” аталышында окутуу өткөрүлдү. Ага шаардык Эмгек, социалдык камсыздоо жана миграция башкармалыгынын башчысы, тиешелүү мекеме,ишканалардын адистери жана шаар тургундары катышты.
Алгач аз камсыз болгон үй-бүлөлөрдү жакырчылыктан чыгаруу, аларга жагымдуу шарттарды түзүү боюнча адистер тарабынан жарандардын финансылык сабаттуулугун жогорулатуу, акча каражаттарын туура колдонуу, каржылык маселелерди түшүнүү боюнча маалыматтар айтылып, окутуу суроо-жооп менен улантылды.
Эске салсак, 2022-жылы Жалал-Абад шаарынан 50 үй-бүлө социалдык келишим долбооруна катышып, жеке ишкердигин баштаган.