Социалдык тармактарда «Жалал-Абадда үгүтчүлөр унаа толо азык-түлүктөрдү шайлоочуларга түндөп таратып жүрүшөт», — деген маалымат тараган. Анда алар «Өнүгүү-Прогресс» партиясынын үгүтчүлөрү экендиги айтылып, шайлоо алдында добуштарды сатып алуу аракети көрүлүп жаткандыгы белгилеген.
Видео Жалал-Абад шаарынын көчөлөрүнун биринде тартылган.
Буга ылайык «Өнүгүү-Прогресс» партиясынын Жалал-Абад шаардык штабынын жетекчиси Майрамбек Адылбеков 7-каналга маалымат берип, тасмадагы окуяга партиянын тиешеси жоктугун билдирди.
«Аты аталган аялдар биздин партияда үгүтчү болуп катталган эмес. Ал эми талапкер деп айтылып жаткан адам катталган, бирок анын шайлоо участкасы башка жакта. Бул багытта азыр шаардык милиция териштирүү иштерин алып барып жатат», — дейт ал.
Ал эми Жалал-Абад ОИИБи азырынча бул тууралуу маалымат бере элек. Жалал-Абад шаардык кеңештин депутаттарын шайлоого бул партиядан сырткары Ата-Журт Кыргызстан, Нур, Ыйман-Нуру, Бүтүн-Кыргазстан партиялары ат салышууда.
