Жалал-Абад шаарында Кыргызстан менен Россиянын аймактарынын достук паркы түзүлөт.
Парктын курулушуна бүгүн, 11-октябрда Министрлер кабинетинин төрагасы Акылбек Жапаров жана Россия өкмөтүнүн төрагасынын орун басары Алексей Оверчук капсула салды.
Кыргыз-орус өнүктүрүү фондунун башкармалыгынын төрагасы Артём Новиковдун берген маалыматына караганда, бул паркка түрдүү иш-чаралар үчүн аянтча, павильондор, веложолдор, балдар аянтчалары, шахмат жана башка спорт аянтчалары курулат. Парктын аянты болжолдуу 7 гектар болот. Новиковдун өз өсүндө аны курууга жалпы 2 млн доллар инвестиция салынып, курулуш иштери кийинки жылы бүтөт деп билдирди.
Министрлер кабинетинин төрагасы Акылбек Жапаровдун жыйында берген маалыматына ылайык, эки тараптын ортосунда соода-экономикалык, илимий-техникалык жана маданий-гуманитардык чөйрөлөрдө кызматташуу тармактарында 40тан ашуун келишим түзүлдү. Эки өлкөнүн облустары менен шаарларынын ортосунда боордоштук мамилелерди түзүү боюнча 10дон ашуун келишимдер бар.
