Ош шаарынын мэри Жанарбек Акаев
тиешелүү кызматтардын жетекчилери менен биргеликте, ишкерлердин кайрылуусунун негизинде А. Навои атындагы парк аймагына барып, парктын ичиндеги көйгөйлөрдү жеринен көрүп чыкты. Бул тууралуу мэриянын басма сөз кызматы билдирди.
Шаар башчысы парк аймагында соода-сатык жайларын иштетип жаткан ишкерлер жана жаңы объектилерди куруп жаткан тараптар менен жолугуп, алардын ортосунда жаралган пикир келишпестиктердин себептерин тактап, бардык тараптардын жүйөлөрүн укту.
Мэр өз сөзүндө шаар тургундары үчүн ыңгайлуу шарт түзүү, ишкерлердин укуктарын коргоо жана шаар аймагындагы тартипти сактоо башкы приоритет экенин айтып, маселени мыйзам чегинде, адилеттүү жана ачык-айкын чечүү зарылдыгын баса белгиледи.
Белгилей кетсек, буга чейин паркты ирээтке келтирүү жана анын көрктүүлүгүн арттыруу максатында эски соода күркөлөр алынып, аймак тазаланып, жаңы көчөттөр отургузулган. Аталган иштер шаар тургундары үчүн коопсуз, таза жана заманбап эс алуу жайын түзүүгө багытталган.
