Бүгүн, 26-ноябрда Бишкекте Биринчи Элдик Курултай ишин улантууда. Курултайда президент Садыр Жапаров сөз сүйлөп, делегаттардын сунуштарын карап, суроолоруна жооп берүүдө.
«Баткен окуясынан кийин чет өлкөгө саммитке бардым. Саммитке барганда, атын атабай эле коёюн бир кесиптешим колумду кармап туруп «Сеникиндей элди жөн эле келип жерин басып алам деген бул акылсыздык» деди. Мындай ыкчам уюшулган, ынтымактуу элди эч ким баса албайт деп… Мен дагы жүрөгүм менен кубандым. Бул баарыбыздын ынтымагыбыз»,-деди өлкө башчы суроолорго жооп берип жатып.
Белгилей кетсек, Курултайга өлкөнүн бардык аймактарынан миңден ашуун делегат, ошондой эле чет өлкөлөрдө жашаган мигранттардын жана диний конфессиялардын өкүлдөрү катышууда.
Делегаттар өздөрүнүн шайлоочулары жолдогон сөздөрүн айтып чыгууда, аймактарды жана айылдарды өнүктүрүү, экологияны жакшыртуу, коңшу мамлекеттер менен чек ара маселелерин чечүү, өлкөнүн экономикасын өнүктүрүү, чет жерде жашаган кыргызстандыктардын көйгөйлөрүнө байланышкан жана башка коомдук маанилүү маселелерди көтөрүп жатышат.
