Бүгүн, 29-августта Жогорку Кеңештин төрагасы Нурланбек Тургунбек уулу атайын заманбап оор техникаларды “Кербен Тазалык жана Көрктөндүрүү” муниципалдык ишканасына тапшыруу аземине катышты.

Салтанаттын алкагында жергиликтүү эл менен жолугушкан төрага өлкөдө жүргүзүлүп жаткан реформалар, анын ичинен Аксы районунда жана Кербен шаарында жасалып жаткан иштер тууралуу сөз кылды.

“Быйыл урматтуу Президентибиз менен сүйлөшүп, Турукташтыруу фондунан 450 млн сом бөлдүрдүк. Анын 34 млн сому техникаларды алууга жумшалса, калганы Кербен шаарында жолдорду салууга берилет. Ошондой эле райондук оорукананын эскилиги жетип, авариялык абалда. Жакында жаңы медициналык жайдын курулушу башталып, бардык керектүү жабдуулар менен камсыздалат”, – деген трага дарыгерлердин жетишсиздиги боюнча көйгөй Аксыда да курч экенин кошумчалады.

Ага ылайык, өзү жеке чөнтөгүнөн эки дарыгерге кошумча айлык акы төлөп, Кербен шаарында иштөөсүнө колдоо көрсөтүп жатканын маалымдады. Муну менен катар жергиликтүү бюджеттин эсебинен техникалык кызматкерлердин айлыгын көтөрүү боюнча да тапшырмаларды берди.

Андан тышкары, Аксы райондук мамлекеттик администрациясы жана Кербен шаарынын мэриясы жайгашкан имаратты көрүп чыгып, аны да жаңыртып куруу зарыл экенин белгилеген Нурланбек Тургунбек уулу айланасын көрктөндүрүү боюнча да сунуштары менен бөлүштү. Ошондой эле бардык курулуш иштерине жергиликтүү элди тартуу менен керектүү адистерди окутуп, даярдоо зарылчылыгына да токтолду.

Баарлашуу маалында шаар тургуну Болот Анарбаев жасалып жаткан иштер үчүн Жогорку Кеңештин Төрагасына ыраазычылыгын билдирип, Кербендин келечегин чагылдырып тарткан символикалык сүрөтүн белек кылды.

“Азыркы тапта Кербендин калкы 46 миңдей. Бирок социалдык-инфраструктуралык курулуштарды жүргүзүүдө алдыңкы 10-20 жылды эске алуу керек. Келечекте бул калаа тургундарга ыңгайлуу, заманбап шаар болушу зарыл”, – деди төрага.

Жолугушуудан соң Нурланбек Тургунбек уулу Кербендин негизги көчөлөрүн аралап көрдү. Алсак, быйыл эки негизги көчө 7 метрден 14 метрге чейин кеңейтилип, ага 423 млн сом жумшалары мерчемделген. Долбоорго ылайык, жөө адамдар басуучу тилке менен кошо веложол да салынат.

Төрага иштин сапатына өзгөчө көңүл буруу керектигин айтып, жолдорду жыл аягына чейин бүткөрүү талабын койду.