Жогорку Кеңештин депутаттары Фархат Исмаилов менен Фарходбек Алимжанов мандатынан ажыратылды. Аталган чечим бүгүн, 6-июлда Борбордук шайлоо комиссиясынын жыйынында кабыл алынды.
Алардын диплому жасалмаланганы аныкталган. Билим берүү министрлигинин комиссиясы Алимжановдун диплому одоно мыйзам бузуулар менен берилгенин, ал Кыргызстанда болбогондуктан мамлекеттик экзамендерди тапшырбаганын аныктаган.
Министрдин биринчи орун басары Уланбек Усековдун айтымында, Исмаилов КУУга кабыл алынган эмес.
Белгилей кетсек, Фархат Исмаилов «Ата-Журт Кыргызстан» партиясы менен депутат болуп шайланган, ал эми Фарходбек Алимжанов «Альянс» фракциясынын тизмеси менен мандат алган.
