Бишкек — Нарын — Торугарт жолунда жол эрежесин бузгандарды дрон менен көзөмөлдөө башталды. Бул тууралуу Жол кыймылы коопсуздугун камсыздоо башкы башкармалыгынан билдиришти.
Дрон менен байкоо жүргүзүү программасы атайын тесттик режимде жол кырсыктардын алдын алуу жана адам өлүмү менен коштолгон оор кесепеттерди кыскартуу максатында ишке кирүүдө.
«Бишкек —Нарын — Торугарт жолунда акыркы учурда жол кырсыктары көп болгонуна байланыштуу дрон учуруп, байкоо жүргүзүү менен иш алып баруу башталды», — деп берилет маалыматта.
Дрондор Ысык-Көл, Нарын тарапка кеткен айланма жолдо учуп, каршы тилкеге чыккандарды, катуу айдагандарды тартып алууда.
Эреже бузгандарга протоколду дрон учкан жерден бир-эки чакырым аралыкта турган Кайгуул милициясынын кызматкерлери жазып берет.
