Россия федерациясынын түштүгүндөгү Анапа шаарында өткөрүлгөн КМШ мамлекеттеринин арасындагы “Жол кыймылынын жаш тескөөчүлөрү-2024” кароо-сынагына катышкан Нарындагы мектеп окуучуларынан түзүлгөн команда бүгүн өлкөгө кайтып келди. Бул тууралуу Жол кыймылынын коопсуздугун камсыздоо башкы башкармалыгынан билдиришти.
Жаш тескөөчүлөрдү «Манас» эл аралык аэропортунан ЖКККББнын кызматкерлери тосуп алып, кызматтык унаанын коштоосу менен алып келишти.
Өлкөнүн намысын коргогон жаш тескөөчүлөрдү жана алардын ата-энелерин, ошондой эле ЖКККББнын ишмердүүлүгүнө салым кошкон мугалимдерди жана мекенчил жарандарды ИИМдин Жол кыймылынын коопсуздугун камсыздоо башкы башкармалыгынын башчысынын орун басары милициянын подполковниги Манасбек Сыдыгалиев башкы башкармалыктын атынан ыраазычылык каттарды жана ардак грамоталарды ыйгарды.
Эскерте кетсек, 40 команданын катышуусунда өткөрүлгөн бул эл аралык кароо-сынакта Кыргызстандын атынан барган жаш тескөөчүлөр 3 диплом, 2 кубок жана баалуу сыйлыктар менен кайтып келишти.
